பன்முக கலைஞர் மதன் பாப் காலமானார்;
மதன் பாபின் உண்மையான பெயர் கிருஷ்ணமூர்த்தி. இவருடைய சிரித்த முகபாவனைதான் இவருக்கான அடையாளம்.
71 வயதான இவர் 100-க்கும் மேற்பட்ட திரைப்படங்களில் காமெடியனாகவும் குணச்சித்திர கதாபாத்திரங்களில் நடித்திருக்கிறார்.
இசைக் கலைஞனாக தன்னுடைய பயணத்தைத் தொடங்கியவர் மதன் பாப்.
நடிகர் மதன்பாபுவை நாம் காமெடி கதாபாத்திரங்களில் ரசித்துப் பார்த்திருப்போம். இவரது நகைச்சுவையும், தனித்துவமான சிரிப்பும் அனைவருக்கும் பிடித்தமானது. எக்கசக்கமான காமெடி கதாபாத்திரங்களில் நடித்து அசத்தி இருக்கிறார் மதன்பாப். மதன்பாப் நகைச்சுவை நடிகர் மட்டுமல்ல. பல்துறை வித்தகராகத் திகழ்ந்தவர்.
நகைச்சுவை நடிகர்களில் இசையமைக்கத் தெரிந்தவர் என்ற பெருமை மதன்பாப்பிற்கு உண்டு. இவர் ஆரம்ப காலகட்டத்தில் மியூசிக் ட்ரூப் வைத்திருந்தபோது இவருடன் இளையராஜா கங்கை அமரன் ஆகியோர் பணியாற்றி உள்ளனர். மேலும் ஏ.ஆர்.ரஹ்மான், மதன்பாப் குழுவில் கீபோர்ட் வாசித்து இருக்கிறார். இதை ஒரு படத்தின் இசை வெளியீட்டில் ஏ.ஆர்.ரகுமானே கூறியிருந்தார். தனது குரு என மதன்பாப்பை பற்றிக் குறிப்பிட்டுச் சொல்லி இருந்தார் ஏ.ஆர்.ரஹ்மான். ஒரு காலத்தில் பாக்ஸராகவும் இருந்திருக்கிறார்.
கடந்த 1984 ஆம் ஆண்டு வெளியான ‘நீங்கள் கேட்டவை’ திரைப்படத்தின் மூலம் தமிழ் சினிமாவில் நடிகராக அறிமுகமனார் மதன் பாப். அதைத்தொடர்ந்து ‘வானமே எல்லை’, ‘தேவர் மகன்’, ‘நம்மவர்’, ‘மகளிர் மட்டும்’, ‘சதி லீலாவது’, ‘பூவே உனக்காக’, ‘நேருக்கு நேர்’, ‘உன்னிடத்தில் என்னை கொடுத்தேன்’ என பல சூப்பர் ஹிட் படங்களில் நடித்துள்ளார். புற்றுநோயால் பாதிக்கப்பட்டு சிகிச்சை பெற்று வந்த நிலையில் இன்று மதன்பாப் காலமானார். மதன் பாப்பின் உடல் சென்னை அடையாரில் உள்ள அவரது இல்லத்தில் குடும்பத்தினர் அஞ்சலிக்காக வைக்கப்பட்டுள்ளது. அவரது மறைவுக்கு திரையுலகினர் இரங்கல் தெரிவித்து வருகின்றனர்.
