சென்னை காட்டாங்குளத்தூரில் எஸ்ஆர்எம் பல்கலைக்கழகம் இணைந்து நடத்தும் 6-வது அனைத்து உலக சைவ சித்தாந்த மாநாடு கடந்த மே 3ம் தேதி நடைபெற்றது. இதில் பாஜக தேசிய தலைவர் நட்டா, தமிழக ஆளுநர் ஆர். என். ரவி, தருமபுர ஆதீனம் மற்றும் பருமாச்சாரிய சுவாமிகள், மதுரை ஆதீனம் உள்ளிட்டோர் பலர் கலந்து கொண்டனர். அப்போது நிகழ்ச்சியில் பேசிய மதுரை ஆதீனம் தன்னை கொலை செய்ய சதி திட்டம் தீட்டி இருப்பதாக கூறினார். மேலும் உளுந்தூர்பேட்டை அருகே தன்னுடைய காரில் வந்து கொண்டிருந்த பொழுது, தன்னுடைய காருக்கு எதிராக கார் ஒன்று வேகமாக வந்து மோதியது. இதில் அதிர்ஷ்டவசமாக உயிர் தப்பியதாக கூறினார்.மேலும் எதிரே வந்த காரில் இருவர் வெள்ளைத் தொப்பி அணிந்து தாடியுடன் இருந்ததாக கூறி இருந்தார்.
மேலும் இது பாகிஸ்தானுக்கு தொடர்பு இருக்கலாம் என்று கூறியது பரபரப்பு ஏற்படுத்தியது.இதனை அடுத்து கள்ளக்குறிச்சி காவல்துறையில் விசாரணை மேற்கொண்ட பொழுது உளுந்தூர்பேட்டை மதுரை ஆதீனத்தின் கார் விபத்தானது தற்செயலாக எதிர்பாராத விதமாக நடந்து விபத்து என்று தெளிவுப்படுத்தியது. இதனையடுத்து, மதுரை ஆதீனத்தின் பேச்சு இருப்பிரிவினருக்கு இடையே குழப்பம் மற்றும் மோதலை ஏற்படுத்தும் விதமாக இருப்பதாகக் கூறி, சென்னைச் சேர்ந்த வழக்கறிஞர் ராஜேந்திரன், சைபர் கிரைம் காவல் நிலையத்தில் புகார் பதிவு செய்தார்.
அந்த புகாரின் அடிப்படையில், மதுரை ஆதீனத்தின் மீது நான்கு பிரிவுகளின் கீழ் வழக்கு பதிவு செய்யப்பட்டது.இதனை தொடர்ந்து தனக்கு எதிராக தொடரப்பட்ட வழக்கினை ரத்து செய்ய வேண்டும் என்று மதுரை ஆதினம் தரப்பில் சென்னை உயர்நீதிமன்றத்தில் மனுத்தாக்கல் செய்யப்பட்டது. அந்த மனுவில், சம்பவத்தன்று ஊடகவியலாளர்களின் கேள்விக்கு பதிலளித்ததைத்தவிர, தனிப்பட்ட முறையில் எந்தவொரு அறிக்கையும் வெளியிடப்படவில்லை என்றும், மோதலைத் தூண்டும் நோக்கத்திலோ அல்லது மதக்கலவரங்களை உருவாக்கும் உள்நோக்கத்துடன் கருத்து தெரிவிக்கவில்லை. மேலும், தனது கருத்தால் எந்தவொரு வன்முறைகளும் நிகழவில்லை என்று,குறிப்பிட்டு இருந்தார். இதையடுத்து தன் மீது பதிவு செய்யப்பட்ட வழக்கை ரத்து செய்யக் கோரப்பட்டுள்ளது.இந்த மனு மீதான விசாரணை சென்னை உயர்நீதிமன்ற நீதிபதி டி. பரத சக்கரவர்த்தி முன்னிலையில் விசாரணைக்கு வந்தபோது, காவல்துறை தரப்பில் பதில் அளிக்கப்பட்டது. அதில், மதுரை மற்றும் கோவை உள்ளிட்ட இடங்களில் ஆதீனத்தின் பேச்சுக்கு எதிராக பல்வேறு போராட்டங்கள் நடைபெற்று வருவதாகவும், மத நல்லிணக்கத்துக்கு எதிரான வகையில் அவர் கருத்து தெரிவித்துள்ளார்.
இதனைக் கொண்டு புகார்கள் அடிப்படையில் வழக்குகள் பதிவு செய்யப்பட்டுள்ளன என்றும் குறிப்பிடப்பட்டது.இதையடுத்து, மனுவிற்கு உரிய பதிலை வழங்கும் வகையில் காவல்துறைக்கு அவகாசம் தேவை எனக் கோரப்பட்டது. அதை ஏற்ற நீதிபதி, வழக்கை ஆகஸ்ட் 14 ஆம் தேதிக்கு ஒத்திவைத்து, காவல்துறைக்கு பதில் மனுத் தாக்கல் செய்ய சென்னை உயர்நீதிமன்றம் உத்தரவிட்டு உள்ளது.
