அரசு வேலை வாங்கித் தருவதாகக் கூறி பண மோசடி செய்த வழக்கில் அமைச்சராக இருந்த செந்தில் பாலாஜி மற்றும் அவரது சகோதரர் அசோக் குமாருக்கு சொந்தமான இடங்களில் அமலாக்கத் துறை அதிரடியாக சோதனை நடத்தியது. இதன் அடிப்படையில் செந்தில் பாலாஜி 2023ஆம் ஆண்டு ஜூன் மாதம் கைது செய்யப்பட்டார். அதுநாள் முதல் அசோக் குமார் தலைமறைவானார். அவருக்கு பலமுறை அமலாக்கத் துறை சம்மன் அனுப்பியும் நேரில் ஆஜராகவில்லை.
இதனிடையே கைது செய்யப்பட்ட சமயத்தில் செந்தில் பாலாஜிக்கு நெஞ்சு வலி ஏற்பட காவேரி மருத்துவமனையில் இதய அறுவை சிகிச்சை மேற்கொள்ளப்பட்டு புழல் சிறையில் அடைக்கப்பட்டார். பலமுறை முயன்ற போதிலும் அவருக்கு ஜாமீன் கிடைக்கவில்லை. சுமார் 14 மாதங்கள் சிறையில் இருந்த செந்தில் பாலாஜி, உச்ச நீதிமன்றம் ஜாமீன் அளித்ததன் பேரில் சிறையில் இருந்து வெளியே வந்தார். அவருக்கு உடனடியாக அமைச்சர் பொறுப்பை முதல்வர் மு.க.ஸ்டாலின் வழங்கினார். ஆனால், அமலாக்கத் துறை தொடர்ந்த வழக்கில் உச்ச நீதிமன்றத்தின் நிர்பந்தத்தின் பேரில் தனது அமைச்சர் பதவியை ராஜினாமா செய்தார்.
அதே சமயம் இரண்டு ஆண்டுகளாக தலைமறைவாக இருந்து வந்த செந்தில் பாலாஜி சகோதரர் அசோக் குமார் கடந்த ஏப்ரல் மாதம் சென்னை மாவட்ட முதன்மை அமர்வு நீதிமன்றத்தில் நேரில் ஆஜரானார். அவருக்கு அப்போதும் ஜாமீனும் வழங்கப்பட்டது. இதுதொடர்பான வழக்கில் குற்றப் பத்திரிகை தாக்கல் செய்யப்பட்டு நீதிமன்றத்தில் நிலுவையில் இருந்து வருகிறது. இந்த சூழலில் இதய சிகிச்சைக்காக அமெரிக்கா செல்ல அனுமதி கேட்டு சென்னை மாவட்ட முதன்மை அமர்வு நீதிமன்றத்தில் அசோக் குமார் தாக்கல் செய்த மனு தள்ளுபடி செய்யப்பட்டது.
இதனையடுத்து, அமெரிக்கா செல்ல அனுமதி கோரி உயர்நீதிமன்றத்தில் மனுதாக்கல் செய்தார். அமெரிக்கா சென்று வரை 15 நாட்கள் அனுமதி தந்தால் போதும் என்றும், நீதிமன்றம் விதிக்கும் அனைத்து நிபந்தனைகளையும் ஏற்கத் தயார் என்றும் அசோக்குமார் தரப்பு கூறியது. ஆனால், அசோக் குமார் அமலாக்கத் துறை பலமுறை சம்மன் அனுப்பியபோதும் விசாரணைக்கு ஆஜராகி ஒத்துழைப்பு அளிக்கவில்லை. அத்துடன், விசாரணை பாதிக்கும் என்பதால் வெளிநாடு செல்ல அனுமதிக்கக் கூடாது என்று அமலாக்கத் துறை வாதிட்டது.
இந்த வழக்கு நீதிபதிகள் எம்.எஸ்.ரமேஷ், லட்சுமி நாராயணன் அமர்வில் இன்று மீண்டும் விசாரணைக்கு வந்தது. அசோக் குமார் தரப்பில், அமெரிக்கா சென்று சிகிச்சை மேற்கொள்வதற்காக இந்திய மருத்துவர் அளித்த பரிந்துரை கடிதம் நீதிமன்றத்தில் சமர்பிக்கப்பட்டது. அமலாக்கத் துறை தரப்பில், அமெரிக்கா போவதற்கு முன்பு தன்னுடைய மனைவி, மகளின் பாஸ்போர்ட்டுகளை ஒப்படைப்பதாக அசோக் குமார் தெரிவித்தார். தற்போது மனைவியின் பாஸ்போர்ட்டை வழங்க முடியாது என்று கூறுகிறார் எனத் தெரிவிக்கப்பட்டது.
அசோக் குமார் தரப்பில், “மருத்துவ சிகிச்சைக்காக அசோக் குமாருடன் அவரது மனைவியும் அமெரிக்காவுக்கு செல்ல உள்ளார். அவருடைய மகள் மட்டும் இங்கு இருக்கிறார். அதனால் அவரது மகள் பாஸ்போர்ட்டை சமர்பிக்க தயாராக இருக்கிறோம். அசோக்குமார் செப்டம்பர் 4ஆம் தேதி அமெரிக்காவில் சிகிச்சை பெற வேண்டிய சூழல் உள்ளது. அசோக் குமார் எங்கேயும் தலைமறைவாக மாட்டார். அப்படி தலைமறைவானது உண்டாக்கும் பின் விளைவுகள் அவருக்கு தெரியும்” என்று தெரிவிக்கப்பட்டது. இதனையடுத்து, அசோக் குமாருக்கு என்ன மாதிரியான நிபந்தனைகள் விதிக்கலாம் என்று அமலாக்கத் துறை அறிக்கை தாக்கல் செய்ய உத்தரவிட்ட நீதிபதிகள், வழக்கை நாளைக்கு தள்ளிவைத்துள்ளனர்.
